На Седницата на судии се разгледаа повеќе прашања кои се од значење за функционирање на Судот во делот на работата на одделите и судските писарници, примената на интерните акти и внатрешните процедури и реализираниот план за новата техничка опрема во согласност со стандардите за заштита на личните податоци, класифицираните информации и архивскиот материјал.

Воедно, претседателката на Врховниот суд на Република Северна Македонија, Беса Адеми, на Седницата на судии истакна дека Врховниот суд продолжува со организацијата на средбите со четирите апелациони судови во врска со воедначувањето и унапредувањето на судската практика како една од клучните активности и заложби на Врховниот суд согласно уставните и законските надлежности.

Интензивирањето на средбите со четирите апелациони судови ќе започне со средбата која ќе се реализира на почетокот на месец јуни и ќе продолжи во текот на целата година. Прашањето за воедначувањето на судската практика е една од темите кои се дискутираат и при редовните посети на претседателката на Врховниот суд на пониските судови од сите апелациони подрачја во државата.