Претседателот на Врховниот суд го запозна амбасадорот на Кралството Шпанија со положбата, структурата и функционирањето на Врховниот суд како највисок суд во државата кој во согласност со своите уставни и законски надлежности обезбедува единство во примената на законите од страна на судовите.

На средбата беа потенцирани улогата и заложбите на Врховниот суд во унапредувањето на судската практика, особено во поглед на примената на стандардите и практиката на Европскиот суд за човековите права.

Говорејќи за улогата на Врховниот суд на Шпанија, амбасадорот Хосе Луис Лозано Гарсија, истакна дека Врховниот суд на Шпанија како и Врховниот суд на Република Северна Македонија имаат надлежност во воедначување на судската практика што претставува одлична основа за зголемена соработка и размена на искуства помеѓу двата највисоки суда.

Исто така, на средбата беше нагласено дека покрај взаемната институционална соработка и соработката со Европскиот суд за човековите права во Стразбур, голем предизвик за Врховниот суд на Република Северна Македонија во иднина ќе биде и соработката со Судот на правдата на Европската Унија во Луксембург.

Во таа насока, од страна на амбасадорот на Кралството Шпанија беа истакнати силните заложби на шпанската влада и на највисокиот суд во Шпанија во поддршката на процесот за интеграцијата на Република Северна Македонија во Европската унија.