Претседателката Адеми во своето обраќање нагласи дека организацијата и надлежноста на судовите, но и нивната опременост, секогаш е во корелација и сооднос со обезбедувањето услови за нивно функционирање.

„Резултатите на реализираниот инвестициски зафат се пред нас, а зад нас остануваат сите тешкотии со кои се соочуваше Управниот суд во текот на изминативе години. Со доделувањето на новиот простор на Управниот суд се овозможува достоинствено да се спроведуваат судењата преку кои граѓаните ќе ги реализираат своите законски права и интереси, и ќе се овозможи непречено функционирање и примена на новиот Закон за управни спорови, кој на граѓаните им гарантира судење со јавни расправи и мериторни одлуки во управните спорови. Управното судство е значаен дел од нашиот судски систем, бидејќи слободно може да кажеме дека принципите и постулатите на правната држава се исполнуваат во оној момент кога од страна на државата се спроведува судска контрола над законитоста на актите на административните органи“, истакна Адеми.