Во своето воведно обраќање претседателката Адеми го истакна значењето на регионалната соработка и дека само преку соработката на меѓународен план судствата можат цврсто да ја одбранат заедничката цел - независност на судството и владеење на правото.

„Ваквата размена на мислења и искуства не само што суштински ги унапредува принципите на судското резонирање и аргументација, туку и ја зајакнува меѓународната соработка и комуникација. Прашањата за судиското поведение и постапување мора почесто да бидат разгледувани на стручните расправи бидејќи произлегуваат од прифатените универзални вредности. Токму овие вредности се предуслов за доверба во судството. Квалитетот на судските одлуки, интегритетот и стручноста на судиите се најсилниот столб на владеењето на правото. Почитувањето на овие принципи говори за тоа колку едно судство е правично, но и современо“, истакна Адеми.

„Судиите и судствата мора да бидат солидарни. Споделуваме исти правни вредности и исправени сме пред исти предизвици. Соработката мора да продолжи и постојано да се унапредува“, нагласи претседателката на Врховниот суд.