Во своето обраќање Адеми истакна дека на патот кон Европската унија издвоени се повеќе важни прашања кои се високо поставени на реформската агенда.

„Сепак, клучните и приоритетни прашања, кои се нагласуваат и во овој Извештај, се прашањата за новата Стратегијата за реформа во правосудниот сектор и за зајакнувањето на довербата на граѓаните во правосудството. Довербата на граѓаните е од круцијално значење за правилното имплементирање на принципот на владеење на правото. Во таа смисла, неопходно е континуирано да се штити интегритетот и независноста на судиите преку доследно почитување на начелото на раздвојување на власта. Јавноста мора да биде уверена во искрената волја за промени и граѓаните мора да бидат охрабрени дека имаат пристап до неутрален и независен суд“, посочи претседателката на Врховниот суд.

Адеми додаде дека само преку заедничката соработка на сите фактори и посебно преку соработката со граѓанските организации може да се исполнат стратешките цели.

„Во последниот период се наметнуваат и повеќе прашања на кои мораме сериозно да им се посветиме. Особено важно е прашањето за борбата против корупцијата. Борбата против корупцијата подразбира и борба за правна држава и за стабилен општествен систем во кој се почитуваат слободите и правата на граѓаните“, нагласи претседателката на Врховниот суд.